20/10/2021
2302021501POS |
|
NAVICELLO "ANNA E CATERINA" |
THE TWO-MASTED SAILING BOAT "ANNA E CATERINA" |
Racconto dialettale di Bernabè Giovanni Stefano |
Dialectal Story of Bernabè Giovanni Stefano |
12/03/2010
‘L dì dop a’ eravan tuti ‘ncim al mol. I avev’n f’nit d’ montar ‘l motor nòv la sera prima. A l’er la prima volta ch’i m’tevn un motor a bórd a un navicel. A jer ‘na piena c’han ‘s ‘s ‘n movev pù. Tuti lì a mirar cos i jern a far a bórd. I pù sveghji i jern già pronti a molar l’ cima. T’ s’ntiv: “Ma cos i’ jen a ‘sptar?!” “Boh! E còs’à so! I n’ saran bòn!” “Sci! I n’en bòn … ajè Silvanin ch’i jà la patenta!” “E ‘n dov i l’à pighjia?” “A n’l so ma a so chi j l’à! Al dovrè saper Luhjion!” Un i s’ spicol: “Oh Lughjion, ‘n dov i l’à pighjia la patenta Silvanin?” “An’ ‘l so nemanc’a me” e un alt’r: “Ah! A jè Silvanin a bord? … alora an'jè problemi ...” . e cuscì via. Ognun i dicev la sòa. A un cert moment un rumor d’ motor ch’i s’ met ‘n mot. Pon, pon, pon, pon …Tuti ziti. I s’ smorz. Tuti ziti. Pon, pon, pon, … I arpart. Tuti ziti. I s’ smorsz. I cuminc’n i comenti. un i dic: “Ma cos a jè!?” “A i sirà aqua ‘n d’la nafta!” “Sci bona: aqua ‘n d’la nafta! I jè ‘l motor chi jè fred!”. E ch’ l’altr: “I dovrè aver’i aces sot anch ‘l fòc. … Mah!». I’er tut un dir. Pò tut’an colp: Pon, pon, pon, pon, pon, pon ...! ‘L motor i ar’part: «’T’à vist ch’i và?!» «Eh! I je brav Silvanin!» «A t’ l’ò dit ch’a n’er la nafta!?» ‘L motor mò i’ndev ch’a l’er ‘na beleza. Angiulin i jer al timon: basco, giach’ton, calzon a mez’asta e d’ scalza. I jer ‘l capitan! I s’ met a molar la cima d’ popa: “Ernè mola a prua!” ‘L navicel mò i jer lib’r. E Angiulin: “Silvanin!” i urlav p’rchè ‘l motor i fev un bordel e Silvanin da bas: “Oooooh?” “T’sen pront?” “Sciiiii!”. Tuti ziti. A s’ s’ntiv soltanto ‘l motor. “Oh! Silvanin!” i urlav, e d’ giù: “Ooooh!” “Ma, t’zen pront?” “Sciiii!”. E la barca ferma, a ‘n s’ n’ movev. Tuti ziti. Angiulin i n’ sapev pu’ che pesci pighjiar, con tuta ch’la genta lì a mirar. I cuminciav a tribolar: “Ma cos’ i jè a far?!” i dicev da lù da lù, e po’ forta: Oh! Silvanin!” e d’ giù: “Oooooh!” “Mah! T’ sen pront?” “E, sciii!” “Mah! E adooraa?” … e un dal mol: “E dì Avanti!” e Angiulin forta: “AVANTIII!” Finalmente la barca a s’ movev. Angiulin i s’ dev da far al timon. Tuti ziti. Pian pian ‘l navicel i s’aluntanav da la banchina. Mò, pian pian i s’ n’ ndev’n tuti, tuti a cà! Ognun i dicev la sòa!
|